ડિંડોલીમાં SOG નો મોટો ધડાકો| 1.698 કિલો અફીણ સાથે ત્રણ ઝડપાયા | CTN Gujarat

ડિંડોલીમાં 1.698 કિલો અફીણ સાથે ત્રણ ઝડપાયા, રૂ.12.91 લાખનો મુદ્દામાલ કબજે

સુરત SOGની કાર્યવાહી, અફીણના છૂટક વેચાણનો ખુલાસો

સુરત શહેરમાં નશીલા પદાર્થોની ગેરકાયદેસર હેરાફેરી અને વેચાણ સામે સુરત શહેર SOG દ્વારા કાર્યવાહી હાથ ધરવામાં આવી રહી છે. આ દરમિયાન ડિંડોલી વિસ્તારમાંથી અફીણનું વેચાણ કરતા ત્રણ આરોપીઓને ઝડપી પાડવામાં આવ્યા છે.

પોલીસના જણાવ્યા મુજબ, SOGની ટીમને પેટ્રોલિંગ દરમિયાન મળેલી બાતમીના આધારે ડિંડોલીના દેલાડવા ગામ નજીક ખોડિયાર રેસિડેન્સી ખાતે કાર્યવાહી કરવામાં આવી હતી. અહીંથી **ભેરારામ માધારામ બિશ્નોઈ (ઉંમર 51), મહેન્દ્રસિંહ રાવતસિંહ રાજપૂત (ઉંમર 39) અને રૂગારામ સેશારામ જાટ (ઉંમર 42)ને ઝડપી પાડવામાં આવ્યા હતા.

તપાસ દરમિયાન આરોપીઓ પાસેથી 1.698 કિલોગ્રામ પ્રતિબંધિત અફીણ, જેની કિંમત રૂ.8.49 લાખ, ઉપરાંત રૂ.4.01 લાખ રોકડા, બે મોબાઈલ ફોન, એક ઇલેક્ટ્રિક વજનકાંટો અને 20 ખાલી પ્લાસ્ટિકની કોથળીઓ મળી આવી હતી. પોલીસે કુલ રૂ.12.91 લાખનો મુદ્દામાલ કબજે કર્યો છે.

પોલીસના જણાવ્યા અનુસાર, પ્રાથમિક પૂછપરછમાં આરોપીઓએ શોર્ટકટમાં પૈસા કમાવવાની લાલચમાં અફીણ ખરીદી ડિંડોલી વિસ્તારમાં છૂટક ગ્રાહકોને વેચાણ કરતા હોવાની કબૂલાત કરી હોવાનું જણાવાયું છે. આ મામલે કાયદેસરની કાર્યવાહી હાથ ધરી રાંદેર પોલીસ સ્ટેશનમાં ગુનો નોંધવામાં આવ્યો છે.

પોલીસ રેકોર્ડ મુજબ, મુખ્ય આરોપી ભેરારામ માધારામ બિશ્નોઈ સામે વર્ષ 2021માં ગોડાદરા પોલીસ સ્ટેશનમાં પણ SOG દ્વારા NDPS સંબંધિત કાર્યવાહી કરવામાં આવી હતી.

સુરત શહેરમાં નશીલા પદાર્થોના ગેરકાયદેસર વેચાણ સામે SOG દ્વારા વધુ તપાસ હાથ ધરવામાં આવી છે અને આ નેટવર્કમાં અન્ય કોઈ વ્યક્તિ સંડોવાયેલી છે કે કેમ તે અંગે પણ તપાસ કરવામાં આવી રહી છે.

Source: SOG SURAT.